أين كان الجميع لما مصر كانت لوحدها؟
بقلم ريهام المصرى
الخلايجه دلوقتى بيهاجموا مصر بعنف على منصة ( إكس) وبيتريقوا (فين جيش مصر) مسافة السكه ؟؟
لا ياحبايبى جيشنا مش مرتزقه يطلع يحارب بمفرده بدلا منكم ولا نسيتم لما الرئيس نصحكم بجيش عربى موحد وانتم ياحكام الخليج اللى رفضتم وخذلتوه !!
اعذرونا مش هنقدر ننسى (ملامح الحزن) على وجه الرئيس فى القمه الطارئه اللى دعى لها ايام حرب غ،،،،زه وكل حكام العرب خذلوه ولم يحضر احد…
مش بننسى و مش بنقدر نسامح اى حد فى يوم من الايام خذل بلدنا..
ومش هنقدر ننسى ان بلدنا وقيادتها وقفت امام التهجير لوحدها والرئيس بنفسه قالها …
قال
(انا كنت واقف لوحدى)
ولما عقد عندنا مؤتمر شرم الشيخ للسلام بحضور الرئيس الامريكى الاعراب البدو كانوا هيتجننوا ان مصر انتصرت بمفردها وقدرت تفرض كلمتها والعالم كله اشاد بالموقف المصرى القوى والاضواء كلها سلطت على مصر وشرم الشيخ ومفيش حد من شيوخ الخليج حضر القمه غير أمير قطر …
ولما مصر دعتكم تشاركوها فرحتها فى عرس افتتاح المتحف المصرى الكبير كالعاده لم يحضر احد من الغيظ من الدوله الكبيره ذات التاريخ والحضاره اللى عامله خرم فى نافوخكم..
اوعوا تنسوا يامصريين مصر دايما واقفه لوحدها.
مفيش حد له فضل عليها ومفيش فواتير على مصر و وقت الجد هى اللى بتقف لوحدها بجيشها وقيادتها تحمى الارض والعرض.
أوعوا ترددوا شعارات (القوميه العربيه) اللى عفى عليها الزمن ومفيش دوله بتعمل بها الا مصر والكل بيدور اولا على مصلحة بلده
عقيدة ( القوميه العربيه) هى اللى رجعت مصر مليون سنه للخلف وللاسف محدش دفع فواتير التضحيه الا بلدنا وشعبها ..
والآن عايزين جيش مصر يطلع يحارب بمفرده بدالهم ويدفع ثمن خنوعهم وخضوهم !!
فين تريليوناتكم اللى استخسرتوها فى مصر ودفعتوها جزيه للرئيس البرتقالى؟
فين القواعد الاجنبيه اللى سمحتم انها تكون فى ارضكم؟؟ ياترى حامتكم ؟؟؟ ..
كلمه ومن اول السطر احنا مش مطالبين ندفع فواتير بدل حد ومش هنضحى بأرواح ابطالنا ..دم المصريين غالى تتروى بيه ارض مصر وبس
#Reham_Elmasry
